最低工資

最低工資有望 (from Apple Daily – 左丁山)

德國政府欲立法制定最低工資, 工商界反應激烈，快遞商TNT立即宣佈附屬公司裁 員，並停止新既擴充計劃，一於睇定D先。德國政府經濟部極力反對，駁斥「最低工資有利工人論」。可惜丫，總理默克爾夫人一於政治掛帥，唔睬經濟部，相信德國會成為歐盟大國之中，最後一個最低工資淪陷區。

香港又點呢？聖誕前碰到一位政界人士，佢話形勢比人強，零八年好可能為最低工資立法。後再與一位以前強烈反對最低工資既廠商講到呢件事，廠商話：「行家都知道最低工資會對中小企最為不利，但中小企既有頭有面人物已經轉晒口號，唔敢反對咯，我地無謂同曾特首對着幹丫，唔既話，曾特首會嬲我地不識趣架。」廠商口中既兩位中小企頭頭 ，原來係大企業老闆，搞慣政治，梗係識得見風駛悝啦 。 香港商人最懂得識時務者為俊傑之道，極少講原則，最叻就係跟着領導人走。廠商話：「我本來反對架，但煲呔都投降左，唔再好似以前咁樣反對最低工資立法咯，我咪支持特首囉，將來有乜後果，我唔知，總之唔好在特首面前失分先。」

好咯，廠商唔敢反對，改口支持最低工資，曾特首大可話佢得到商界充分支持，推行立法。呢個情況，究竟雞生蛋還是蛋生雞，無謂深究。社會上仲有冇人反對呀？有，就係經濟學家，與《蘋果日報》幾位評論員，政黨之中，除自由黨外，全部贊成，故此最低工資立法一定可以數夠票，在立法會通過。聽講自由黨研究過經濟學家反對既理由，認識到最低工資並非係對工人有利既最好方法。但政治現實就係，當中小企、廠商會等等開始睇特首面色轉口風，自由黨如果在議會反對推行最低工資既話，有乜野好處呢？不如妥協好過。最低工資在世界上好多國家推行，並非因為合乎經濟學原理，而係合乎政治選舉與選票既現實，犧牲工人長遠利益在所不惜！(完)

--------------------------------------------------------------------------

老實講,依加好多老闆都不斷剝削基層員工,好多時佢地既人工連基本需要都逹唔到,有D甚至乎連綜援的金額都逹不到…咁我覺得最低工資對基層未賞不好…至少佢地唔會變左做同唔做都係咁多錢,而全部一齊唔做野去攞綜援…(咁樣我覺得可以減少中層既負擔,如果唔係,就係中層所交既稅黎養哂佢地…).

但我覺得如果最低工資立法,應該要連埋最高工時一齊定立,否則無良既顧主就會增長工作時間去平衡返佢地最大既benefit….